Систем за инфузија со остатоци од крв во пластичната цевка фрлен на земја пред контејнер. Оваа слика ја доловува несовесноста на поединци и неажурноста на комуналните служби во Тетово. Фотографијата е направена на улицата „Цветан Димов“ кај контејнерите поставени непосредно после објектите на СВР Тетово покрај реката Пена.
Ваквите фотографии на социјалните мрежи се честа појава со која дел од жителите на Тетово постојано укажуваат на несовесноста на луѓето. Дури и центарот на градот не е поштеден од постојаното фрлање на отпадоци. Фотографиите околу Центарот на култура ја доловуваат сликата во централното градско подрачје на само неколку метри од градскиот плоштад. Отпадоци пред се од пластична амбалажа и друг вид смет го има на малкуте зелени површини. Како место за смет наместо како прочистувач на воздухот се користи и ткн. „градско дрво-еколошкиот билборд“.
Во текот на летниот период жителите на Тетово се соочуваат и со потребата од поголема општинска грижа за комуналниот смет. Поради зголемување на бројот на луѓе-печалбари кои доаѓаат на одмор во родниот крај повеќекратно се зголемуваат количните смет кои се собираат во контејнерите па и надвор од нив. Сметот кој се собира низ градот пред да се однесе во депонијата Русино се складира на претоварна станица која сега ја промени локацијата и се наоѓа во Фалише.
Според тетовската градоначалничка Теута Арифи проценките се дека нема да ги имаат старите проблеми, односно повторно да се собираат огромни купишта смет налик на дива депонија.
-Кога сме работеле за добивање дозволи за работа, имаме дозволи за двете локации. На времето кога сме ги спремале, сме спремале документација за двете позиции. Така да мислам дека нашето јавно комунално претријатие проценило дека можеби во моментот им врши тука повеќе работа. Остануваат договорите со депонија Дрисла за носење на сметот таму додека претоварните што помалку да имаат работа“, изјави Арифи.
Неодамна невладината организација Еко Герила преку јавен повик побара Владата да ги одземе ингеренциите на општина Тетово поради неисполнетите законски обврски и нерешени проблеми пред се во областа на животната средина.
