Иако од овој месец во дел од училишните дворови во Тетово се овозможува бесплатно паркирање, сообраќајниот метеж и непрописното оставање на возилата продолжуваат како непишано правило во летните месеци, особено со доаѓање на печалбарите. Од тетовската полиција потенцираат дека непрописното паркирање е причината за создавање на сообраќајниот метеж, па затоа апелираат за доследно почитување на законските прописи.
-Вчера (6 јули) биле откриени, законски санкционирани и подигнати вкупно 14 непрописно, односно погрешно паркирани возила, пред се во централното градско подрачје. Или во изминатите три месеци, април, мај и јуни, бројот на подигнатите возила од тетовската „пајак-служба“ изнесувал 380. Секторот за внатрешни работи Тетово апелира доследно да се почитуваат сите знаци и правила околу паркирањето. Да не се оставаат возилата на тротоари, зелени површини, во зона на крстосници или до контејнери. Зашто, во спротивно сопствениците на возила ќе бидат санкционирани со законски предвидените поднесоци и со парични глоби кои за ваквиот вид прекршоци се движат од 45 до 200 евра во денарска противвредност, информира Марјан Јосифоски, портпарол на СВР Тетово.
Доаѓањето на печалбарите ќе значи зголемување на бројот на возилата па од општина Тетово апелираат за користење на зонското паркирање како и бесплатниот паркинг во дел од училишните дворови.
-Во Тетово во летните месеци, во јуни, јули и август за потребите на граѓаните секоја година ги отвора школските дворови за да се зголеми бројот на паркинг места. Добро е граѓаните да ги користат тие паркинг места, поради зголемениот број на возила како резултат на дојдените печалбари. Исто така во летниот период добро е граѓаните да не ги користат возилата со цел намалување на метежот во градот но и зачувување на животната средина имајќи во предвид дека Тетово е град каде секаде може да се стигне и без возило, велат од службата за односи со јавноста при општина Тетово.
Во Тетово од 2015-та година е воведено зонското паркирање. Во зона А на булеварите „Илирија“ (поранешен Маршал Тито) и дел од булеварот „Илинденска“ паркирањето чини 30 денари за еден час. Во зоната Б спаѓа зонско паркирање на повеќе улици, а еден час чини 20 денари.
А.С