Во Тетово денес беше одбележана 18 годишнината од загинувањето на Цоки Стојановски во оружениот конлифкт во 2001. Стојановски беше полициски службеник во сообраќајната полиција, а животот го загуби при извршен напад врз полициски пункт кај објектот на Радио Тетово.
Утринава беше одржан помен парастос на неговиот надгробен споменик на православните гробишта во Тетово. Потоа му беше оддадена почит со положување цвеќе на неговата спомен биста во кругот на сообраќајната полиција во Тетово.
-Тука сме да оддадеме почит на загинатиот бранител. Покрај одавањето почит ние имаме обврска како здружение се грижиме за сите семејства на сите настрадани бранители, изјави Владо Стојановски, претседател на здружението на бранители “Македонски херои од 2001 година“.
Во чест на загинатиот полицаец започна одржувањ на 8-миот традиционален турнир во мал фудбал.
Покрај семејството и роднините, почит на Стојановски му оддадоа вработени во Секторот за внатрешни работи Тетово, Полициската станица за безбедност во патниот сообраќај, делегација на ОК ВМРО ДПМНЕ Тетово и претставници на здружението на бранители “Македонски херои од 2001 година“.
Стојановски загина на 28 годишна возраст, беше оженет и татко на две деца.