Самир Љума од Тетово и Фејми Даут, двајцата кинематографери на „Медена земја“ добија награда за најдобра кинематографија за документарен филм на 34. доделување на ASC наградите (The American Society of Cinematographers).
Оваа награда важи за најпрестижна светска награда во областа на кинематографијата, бидејќи ја доделува Асоцијацијата на кинематографери на Америка.
Наградата на кинематограферите им ја врачи режисерот Тод Филипс, кој во својата најава рече дека ова е „златно време на документарниот филм“.
„Медена земја“ е во трката за претстојните „Оскари“ во две категории – за најдобар документарен филм и за најдобар странски филм.
Филмот е во режија на Љубомир Стефанов и Тамара Котевска, продукцијата е на Атанас Георгиев, кој е и монтажер, а кинематографијата е на Фејми Даут и Самир Љума.
