21 годишен жител на селото Камењане (С.Ш.) вчера околу 14 часот и 15 минути бил приведен од полицијата врз основа на судска наредба. Тој е осуден на тригодишна затворска казна за сторено кривично дело „неовластено производство и пуштање во промет на наркотични дроги, психотропни супстанци и прекурсори“, информираше денеска портпаролот на СВР Тетово Марјан Јосифовски.По приведувањето во СВР Тетово, спроведен е во КПУ „Тетово“ за издржување на затворската казна.
57 годишен тетовец (А.М) завршил во Полициската станица во Тетово, откако во неговиот дом и помошните простории кои ги користел била пронајдена дрога. Како што соопштија од СВР Тетово, полициски службеници вчера околу 17 часот и 30 минути извршиле претрес во домот на А.М. лоциран на улица „Илинденска“ во Тетово, при што била пронајдена марихуана. Тој бил приведен и задржан во Полициската станица Тетово за расчистување и документирање на случајот.
Од тетовската полиција информираат и дека вчеравечер била пронајдена дрога при претрес на возило на улицата „Борис Кидрич“ во Тетово. Околу 21 часот и 20 минути, полициски службеници забележале патничко моторно возило „Ауди А5“ со тетовски регистерски таблици, управувано од 39 годишник (Д.М.), а во кое се наоѓале и 18 годишник (С.Д.) и 16 годишно лице, сите од Тетово. При преглед на возилото пронајдена е марихуана, дробилка и ризла. Лицата се лишени од слобода по што ќе следи расчистување на случајот.
Јована Костеска
