Здружението за култура и уметност „Иљо Антески-Смок“ од Тетово согласно мерките за спречување на ширење на коронавирусот го прилагодува конкурсот за најдобра необјавена песна и ликовна творба за деца, млади и возрасни „Мајски латици“. Наместо по пошта предлозите сега треба да се испраќаат по електронска пошта (имејл), а воедно продолжен е рокот на испраќање.
-Конкурсот за најдобра необјавена песна за деца, млади и возрасни на тема „Мајски латици“ се
продолжува до 15 април. Напишаните песни треба да се достават на електронската адреса (е-mail) iljoanteskismok@yahoo.com. Треба да се пратат два ворд документи. Во едниот е песната, да стои шифра на песната и во која категорија ќе конкурирате. Во вториот треба да стои шифра на песната со лични податоци и тоа: име и презиме, ден месец и година на раѓање, одделение /клас/училиште или факултет, место и адреса на живеење, телефонски број за контакт и е-маил, соопштуваат од Здружението.
На конкурсот за најдобра необјавена песна има категории деца, млади и возрасни и ќе се доделат прва награда, две втори и три трети награди. Песните треба да бидат на македонски јазик. Истите категории и награди ќе ги има и за конкурсот за ликовна творба каде техниката е по слободен избор на авторот.
А.С
