Манастирската црква „Свети Илија„ од село Лукојца (Луковица) ги поканува верниците и граѓаните на прослава на патрониот празник на 2-ри август, петок 2019 година – Илинден. Во 10 часот започнува свечената црковна литургија во црквата „Свети Илија“ , а за 12 часот е предвидена братска и сестринска трпеза на љубовта и сеопшта народна веселба. Заинтересираните за превоз да се јават на 070-371-616.
Патрониот празник Свети Илија на црквата во тетовското планинско село Луковица (Лукојца) е поводот голем број граѓани од многу градови да дојдат во ова речиси иселено село на планината Сува Гора на 2-ри август Илинден. Селото се наоѓа на речиси 1000 метри надморска височина во склоп на општина Желино. Од црковниот одбор ги покануваат сите верници на заедничка прослава која секоја година ја организираат повеќемина кумови.
-Оние кои потекнуваат од Луковица или Лукојца на тетовски дијалект живеат насекаде низ Македонија. Поради тешка пристапност до селото со оглед дека дел од патот со децении стои неасфалтиран луѓето се преселнија освен во Тетово и Скопје и во другите градови на државата како и во Србија и западно-европските земји, вели Ацо Спасеновски од црковниот одбор.
Минатата 2018 година во Луковица се освети параклисот посветен на Света Петка изграден на влезот во тетовското планинско село Луковица. Градењето на црковниот храм траеше 14 години, а со тоа селото доби трето православно светилиште, по црквите Свети Илија и Свети Георгиј.
Во црквата Света Петка во план е довршување на фрескоживописот, но и уредување на дворот со цел да собере поголем број на верници кои ќе сакаат да и оддадат почит на светицата.