Задолжително заклучување на возилата, а внатре на виделина да не бидат оставани вредни предмети со цел да не бидат мета на крадци. Ваков е најновиот апел на СВР Тетово откако минатата недела беа украдени две возила „БМВ“ и „Фолксфаген голф“, токму како резултат на незаклучени возила.
Секторот за внатрешни работи Тетово повторно со апел до сопствениците на моторни возила да не ги оставаат незаклучени и со клуч во брава.Зашто, на тој начин возилата стануваат мета за крадците. Покрај ова, им се укажува, исто така, на седиштата од возилата да не оставаат лаптоп-компјутери, чанти, мобилни телефони, несесери, скапи очила за сонце и други предмети, кои можат да ги намамат крадците и да ги поттикнат на насилно провалување, најчесто со кршење на стаклата на вратите, апелираат од СВР Тетово.
Тетовската полиција и ова лето реализира бројни превентивни и други мерки и активности за заштита од тешки кражби во куќи, станови и моторни возила.
А.С
