Претставници на тетовската и кумановската локална самоуправа денес во Тетово одржаа работна средба за размена на најдобри практики во насока на превенција и справување со насилен екстремизам. Организаторите на средбата, невладините организации Американски Републикански Институт и Нексус-граѓански концепт, го потенцираа успешното и лидерско искуство на општина Куманово во државата.
„Добрите практики на Локалниот совет за превенција во Куманово може да укажат како во Тетово истиот да биде поактивен. Кумановскиот совет успешно ги врзува во партнерство повеќе институции, рече Афродита Муслиу од Нексус-граѓански концепт.
Кумановскиот градоначалник Максим Димитриевски потенцира дека по пат на дијалог, дискусија, треба да се работи на темата во јавноста и така се доаѓа до поголеми резултати.
„Едноставно превентивно се делува на одреден план на заштита на општеството од потенцијални ризици, подобро е да се разговара пет пати отколку да се делува со репресивни средства кое го има единствено полицијата . Имаме многу случаи каде млади групи знаат да се радикализираат, на спортски настани, манифестации, за верски радикализам, но отворено и активно се зборува и работи на превенцијата на општеството, рече Димитриевски.
Според него во Македонија првенствено треба да се негува традицијата и мултиетничкиот карактер.
„Секој денар вложен на полето на превенција после години се враќа 20 пати повеќе. Многу е добро да потрошите на старт помалку средства а повеќе време да се посветите на една тема отколку да се генерира одреден проблем да морате истиот да санирате дополнително и самата санација остануват последици во општеството,рече Димитриевски.
Градоначалничката на Тетово, Теута Арифи потсети дека локалниот совет во Тетово работи над една деценија со редовни средби со институциите, како што се СВР Тетово, ОБСЕ и други кои се важни за овој процес.
„Можам да се пофалам во секторот образование и полиција затоа што ни било многу важно во нашите училишта да имаме стабилни ситуации. Важен состанок за две општини каде има претставништва на ОБСЕ, со оглед дека глобалните опасности се сериозни и треба да има и локални мерки да се превенираат тие ситуации, изјави Теута Арифи, градоначалник на општина Тетово.
Џемаил Ајвази претставик на Националниот комитет за справување со насилен екстремизам и тероризам при Владата истакна дека телото не се ограничува на владин и невладин сектор туку кон сите чинители кои може да придонесат во превенција.
А.С