Македонската православна богословија Свети Климент Охридски во Скопје или средното богословско училиште, кое постои од 1967 година, е образовната институција каде своето образование го стекнале речиси 1000 ученици, завршени богослови од кои во голем дел потоа се во служба на МПЦ како свештенослужители. Голем број тетовски свештнонослужители своето средно образование го имаат стекнато таму, а неколкумина биле и ангажирани како професори.
Оваа образована институција се востановува со возобновувањето на автокефалноста на Охридската архиепископија во лицето на Македонската православна црква, на Третиот црковно-народен собор, одржан во Охрид, во 1967 година, при што се донесува и Одлука за формирање на средно богословско училиште, во кое ќе се школува, на свој мајчин јазик, идниот кадар на Македонската Православна Црква. Првично за простории на Богословијата се одредуваат адаптирани згради на манастирот Горен св. Илија во с. Бањани, Скопско, а подоцна во сегашниот објект во село Драчево.
На 27 јуни годинава во присуство на ректорот на Богословијата, митрополитот Повардарски г. Агатангел, пратеникот на Синодот на МПЦ-ОА митрополитот Тетовско-гостиварски г. Јосиф, митрополитот Брегалнички г. Иларион и митрополитот Европски г. Пимен се поделиле сведителствата и дипломите на 52 генерација на 19 успешно завршени матуранти-богослови.Ученикот Борис Стоилковски бил прогласен за ученик на генерацијата.
Во моментот во Богословијата како професор работи Живомир Јосифоски од Тетово. Тој е еден од многумината тетовци кои го завршиле средното богословско училиште. Роден е 1988 година во Тетово) од православни родители протојереј Томислав и Афродита, по завршувањето на основното училиште, во родниот град, школувањето го продолжил како ученик во XXXIX генерација богослови во Македонската православна богословија „Свети Климент Охридски” – Скопје (2002 – 2007). Со понатамошно богословско надградување се здобил на Православниот богословски факултет „Свети Климент Охридски” – Скопје (2007 – 2012), а потоа во Санкт-Петербуршката духовна академија – Русија (2013 – 2016), каде магистрира со одбрана на магистерскиот труд од областа на новозаветната егзегетика, на тема: „Егзегеза на случувањата во последните денови и Воскресението на Господ Исус Христос во македонските, српските и бугарските истражувања на XX – XXI век”. Од 1 јануари 2017 година е назначен за професор во Македонската православна богословија. Предава предмети Свето Писмо, Стар завет, Патрологија и Догматика.
Во изминатите десетина години од тетовскиот крај и таму учеле и Филип Станкоски, Милош Дрпа и Ангел Василковски. Како предавачи биле свештенослужителите Синиша Ристоски (од 2003 до 2007) и Жарко Мицковски (од 2006 до 2009). Ученици во ова училиште биле и сегашниот владика на тетовско-гостиварската епархија г. Јосиф како и сегашниот ректор владикатаа г. Агатангел.
За запишување во Бгословијата е потребно учество на приемен испит во јуни во пресрет на учебната година која почнува од септември. Богословијата предвидува пет училишни години или пет класови. На крај од петгодишното образование се полага зрелосниот испит за матурантите при Богословијата. Матурскиот испит предвидува писмената работа и полагање по стручните предмети.
Учениците кои сакаат да посетуваат Богословија како избор за средношколско образование треба да престојуваат во тамошниот интернат со оглед на целодневните обврски поради потребата за теоретско образование и духовна наобразба. Наставата се одвива од понеделник до сабота, а во недела денот според Божјите заповеди е ден за одмор и посветување на Бога.
-Од понеделник до сабота будењето е во 6 часот, па во 6.30 е предвидена утрената молитва во тамошниот параклис, а во тие половина час учениците имаат можност за сите утрински потреби. По појадокот од 8 часот започнува наставата која се одвива се до 12 часот и 50 минути. Следува ручек во 13 часот па слободно време се до 15 часот кога е вечерата молитва.
Од 16 часот занимањата, за време на кои учениците се подготвуваат за часовите од наредниот ден. Остатокот од денот учениците учествуваат во вечерните богослужби и богословски трибини, имаат хорски проби, литературна секција, спортско попладне како и слободни активности надвор од објектот на Богословијата.
Во рамки на својата духовна наобразба сите ученици имаат свои послушанија, едни се читачи за време на бослуженијата, други пејачи, некои прислужници во олтар и други задолженија. Дел од образованието на учениците се и поклонички патувања, објаснува Живомир Јосифоски.
Професорите од Богословијата заедно со учениците го издаваат и ученичкото списание „Млад Богослов“ кое се печати во 300 до 500 примероци.
Богословијата има своја библиотека која брои речиси 10.000 книги, како и своја интернет страница.
Александар Самарџиев