Актерите од Драмското студио Тетово ќе патуваат во Србија каде заедно со аматерската театарска секција на Домот на култура „Кочо Рацин“ од Јабука, Општина Панчево ќе одиграат двојазична претстава-детска пиеса „Мојот дедо рокер“.
Актерите од Јабука ќе глумат на српски, а актерите од Тетово на македонски јазик. Деновиве паралелно се одвиваат читачките проби во Јабука и Тетово, а од 27 јули па 1 август комплетната актерска екипа ќе се состане на заеднички сценски проби на сцената на Домот на културата во Јабука.
Оваа претстава премиерно ќе биде изведена во рамките на одбележувањето на Илинден во Јабука на 2 август 2023 година, а потоа и на 20-тиот јубилеен Меѓународен детски театарски фестивал, којшто ќе се одржи првиот викенд во месец ноември во Јабука.
-Ова е втора копродукциска претстава на Драмското студио Тетово и „Позориштанце Мали принц” при Домот на културата „Кочо Рацин“ по мојата детска пиеса „Двете мали самовили“ („Две мале виле“)”, чиј режисер бев јас, со којашто пролетта 2012 година победивме на Општинските драмски смотри во Панчево, а есента истата година беше изведена и на Меѓународниот детски театарски фестивал во Јабука. Очекуваме и се надеваме дека Министерството за култура на Република Северна Македонија ќе се вклучи во овој меѓународен проект со финансиска поддршка на Драмското студио Тетово со покривање на дел од трошоците, изјави Мирко Видоески од Драмско студио Тетово автор на пиесата.
Во претставата од Драмското студио Тетово ќе настапат актерите Игор Бачоски, Глигорије Стојановски и Лазар Саровски. Автор и режисер на претставата е Мирко Видоески. Претставата е финансиски поддржана од Градот Панчево и Министерството за култура на Република Србија.
ас
фото Дом на култура „Кочо Рацин“-Јабука
