По вонредните избори на 20 август денеска се одржа конститутивна седница на Советот на Општина Тетово на која за претседател се избра Бесар Дурмиши од Движење Беса кој и во претходниот состав ја извршуваше оваа функција.
За него гласаа вкупно 16 советници што претставува мнозинство од вкупно 31 член, односно 12 советници од Движење Беса и четворицата од ВМРО ДПМНЕ.
-Очекувам овој совет да биде конструктивен, да работи и да носи одлуки за доброто на граѓаните на Општина Тетово. Сега немаме време за чекање имаме многу работи, многу извештаи што не се поминати. Посакувам овој Совет да биде функционален и сите одлуки што ќе ги донесе да ги донесе за доброто на граѓаните. Треба да се донесат завршни сметки на општината, на училиштата, ребаланс на буџет, има многу проекти што не се поминати. На втората и третата седница во септември и октомври сите овие проекти ќе поминеме за да можат претријатијата да работат како што треба, изјави Бесар Дурмиши.
На новинарско прашање кога седниците кои се пренесуваат во живо на интернет страницата на Општина Тетово ќе имаат превод и на македонски јазик, Дурмиши рече дека за тоа требаат нова апарати за кои треба да се најдат средства.
-Треба да се види во ребалансот и во новиот буџет кога ќе го планираме за идната година да се предвидат средства за да се стават и да се купат елементи за превод на македонски јазик, рече Дурмиши.
Останатите присутни 14 советници од ДУИ, ДПА, СДСМ и Алтернатива гласаа воздржано.
-Ние како СДСМ во Советот ќе делуваме како конструктивна опозиција и сите проекти на мнозинство кои се во интерес на сите граѓани ќе ги подржиме, а тие кои не се нема да ги поддржиме. Партиски став е дека треба воздржано да се гласа, се надевам дека во иднина како советничка група ќе се залагаме за интересите на граѓаните, изјави советникот Глигорије Стојановски.
Првата седница почна да ја води најстариот член д-р Ратко Давидовски, кој по изборот го препушти местото на новоизбраниот Дурмиши.
