Несовесна детска игра е причината вечерва околу 20 часот и 15 минути да избувне пожар на едно од дрвјата пред зградата на Музеј на тетовски крај (Дом АРМ) во Тетово. Со брза интервенција на пожарникарите пожарот беше изгаснат.
Директорот на музејот Миќо Стојчевски информираше дека пожарот настанал поради деца кои употребувале пиротехнички материјали.
– На снимките од надзорните камери видов дека пожарот настана откако деца кои застанати пред објектот запалија пиротехнички материјали, нешто како огномет. Од тоа се запали дрвото, но за среќа веднаш пристигнаа пожарникарите кои за 15-тина минути го изгасија пожарот. Поради ова морам да апелирам до сите родители и деца за поголема совесност и да не користат вакви пиротехнички материјали од кои можат да настанат поголеми последици, информираше директорот Миќо Стојчевски.
Пожарот е пријавен во СВР Тетово од страна на станарите во околината.
Пожарот се случува во период кога токму СВР Тетово има ипревентивно-едукативната кампања „Петарди НЕ, безбедност пред сè“, а вчера на само стотина метри од објектот делеа летоци.
Продажбата и активирањето на вакви пиротехнички средства, покрај прекршочно може да се санкционира и со кривични пријави, зависно од околностите и крајните последици.
ас