Драмско студио Тетово почнува со проби за нова премиера во јуни, а ќе гостуваат во Гостивар и Белград
Две гостувања со претставата „ВАЈ-ФАЈ“, како и почнување со проби за премиера на комедијата „ВИ Спасувач на бракови“. Ова го најавуваат од Драмското студио Тетово за нивните активности во текот на април и мај.
Прво, во петок, на 12 април со почеток во 19.30 часот во големата сала во Центарот за култура АСНОМ во Гостивар за гостиварчани премиерно ќе биде изведена хит претставата ВАЈ-ФАЈ од писателот Мирољуб Недовиќ-Рики а во режија на Мирко Видоески.
„Публиката во Гостивар ќе има можност да се насмее на згодите и незгодите на две семејства од Тетово кои се посватуваат,а нивните деца се во странство.Текстот е многу актуелен и колку што има хумор во него сепак остава една доза горчлива насмевка затоа што никого не го остава рамнодушен сето ова што се случува со иселувањето на младите од Македонија, информира Игор Бачоски од Драмско студио Тетово.
Ова претстава исто така во мај ќе гостува во српскиот главен град Белград на Манифестацијата „Деновите на македонската култура 2024“во организација на Здружението на Македонците во Белград „МАКЕДОНИУМ“ и Советот на Македонците во Република Србија
Наредната недела, во среда 17 април Драмското студио Тетово ќе почне да се подготува за новата театарска претстава комедијата „ВИ-Спасувач на бракови“.
„Ќе се работи на на текст на нашиот прославен драмски писател и текстописец Огнен Неделковски со наслов „ВИ-Спасувач на бракови“. Многу инспиративен текст, се надевам дека екипата на Драмско Студио Тетово убаво ќе ја подготви, а премиера е најавена за почетокот на јуни 2024 година, информираше Бачовски.
Тој воедно информира дека по подолго време за оваа претстава ќе се подготви и авторска музика на која ќе работи групата „Легенда“.
ас