Вториот дел од Втората фудбалска лига за сезоната 2023/24 година, под раководство на новиот шеф на стручниот штаб Стојан Тодоровски фудбалскиот клуб Тетекс го почнува, утре сабота, со натпревар дома во Тетово. Новиот шеф на стручен штаб има на располагање и девет нови фудбалери, додека четворица играчи од Тетово заминаа во нови средини.
Во првиот натпревар од пролетната полусезона во рамки на 16-тото коло Тетекс утре ја пречекува Победа Прилеп. Натпреварот почнува од 14 часот и ќе се игра на стадионот од Агенцијата за млади и спорт на Спорто-рекреативниот центар во Тетово.
„Нашите очекувања се доста позитивни и добри, бидејќи добро го одбработивме подготвителниот дел. Има склоп на екипа, со доста млади играчи со неколку искусни играчи кои што се одлично составени. Мислам дека ќе бидеме мало изненадување во првенството и се надевам дека тоа ќе го покажеме уште на првиот натпревар со Победа дома, одиме на три бода, сè друго е неуспех“ изјави новиот шеф на стручен штаб Стојан Тодоровски.
Бенјамин Демир (од Вардар), Стефан Стефановски (Новаци), Арѓент Зибери (Партизани, Албанија) Александар Анѓелковски (Арсими) Арѓент Алија (Шкендија), Ерјон Елмази (Шкендија), Леонид Илиевски (Вардар), Рами Рахми (Гостивар) и Емрах Фејзули (Ренова) се новите фудбалери кои дојдоа во ФК Тетекс.
Во рамки на подготовките кои се одвиваа во Тетово, одиграни беа пријателски натпревари со Беса, Охрид, Башкими и Арсими. Од тетовскиот клуб заминаа фудбалерите Петар Обадиќ во Грција, Рихан Зеќири во Косово и Никола Сарески во Победа од Прилеп.
ас