Во рамките на континуираните активности за поголем ред и безбедност на патиштата во Полошкиот регион, денеска (14 декември) од 6 до 10 часот на тетовското подрачје спроведена е акциска контрола на автобуси и други возила кои вршат јавен превоз на патници и посебно на ученици. При контролата откриени и санкционирани се 4 прекршоци.
Едно возило (автобус) имало неисправни сопирачки, едно возило го управувало лице со важечка забрана за управување, едно се движело со оштетено предно ветробранско стакло и едно запрело за слегување на патниците надвор од постојка.
-На сите прекршители изготвени им се предвидените поднесоци и тие ќе се соочат со парични глоби кои, зависно од видот и карактерот на констатираниот прекршок, се движат од 45 до 500 евра во денарска противвредност, а ќе следат и глоби за правните лица и нивните одговорните лица. На гостиварското подрачје ,пак, не биле откриени технички и други недостатоци, додека две од контролираните возила не поседувале зимска опрема, информира портпаролот Марјан Јосифоски.
Секторот за внатрешни работи Тетово уште еднаш со апел до возачите кои вршат јавен превоз на патници навреме, односно задолжително да ја проверуваат техничката исправност на возилата и пред се на сопирачките и уредите за управување, но и целосно да се придржуваат на постојните сообраќајни знаци, правила и прописи.
-Ова, дотолку повеќе што претстои период на значително поголема сообраќајна динамика во регионот, особено во втората половина на овој и првата половина на идниот месец, потенцира портпаролот.