Полициски службеници на СВР Тетово во координација и содејство со Одделот за криминалистичка полиција – Сектор за недозволена трговија со оружје, дрога и опасни материи на МВР, вчера (19 септември) околу 17 часот и 15 минути го лишиле од слобода 56-годишниот тетовец Љ.Ј.
-При претрес во неговиот дом, извршен со судска наредба, биле пронајдени и одземени ловечка пушка калибар 16 милиметри, 22 патрони од ист калибар и оштетена пломба за деактивирање на пушката. Покрај тоа, пронајден и одземен му е и пиштол „цз“ калибар 9 милиметри, три рамки и 13 куршуми од истиот калибар. Тој е задржан во Полициската станица Тетово и по целосно документирање на случајот, против Љ.Ј. ќе следуваат адекватни поднесоци, информира СВР Тетово.
Вчера (19 септември) околу 15 часот и 20 минути, полициски службеници на СВР Тетово го лишиле од слобода В.Е.(56) од тетовска Мала Речица. При претрес во неговиот дом, извршен со судска наредба, била пронајдена и одземена дигитална вага со остатоци од бела прашкаста материја. Се расчистува и документира случајот, по што против него ќе следува соодветен поднесок.
Вчеравечер (19 септември) околу 23 часот полициски службеници на СВР Тетово го лишиле од слобода 18-годишниот Ф.А. од тетовско Боговиње. При негов и преглед на патничкото моторно возило „форд фокус“ со тетовски регистарски ознаки, кое го управувал, била пронајдена и одземена марихуана. Ф.А. е задржан во Полициската станица Тетово за расчистување и документирање на случајот.
Полициски службеници на СВР Тетово, вчера (19 септември) околу 12 часот и 15 минути го привеле 37-годишниот тетовец Д.Р. затоа што кај него бил пронајден и одземен нож. По целосно расчистување на случајот против него ќе следува поднесок по Законот за оружје.