Во рамки на Лего турнејата „Градење со лего коцки-Еко градови на иднината“ организирана од Здружението „Еко логик“, во ООУ „Гоце Делчев“ во Тетово се реализираа четиридневни работилници на кои учествуваа учениците од второ до петто одделение. Учениците имаа можност да осмислуваат еколошки решенија при градење на дом или училиште со лего коцки.
Според координаторот на работилниците за ова училиште, Соња Трифуновска, овие работилници се многу корисни и интересни за учениците и придонесуваат за развивање на еко свеста и поттикнување на размислување како да се применуваат повеќе еколошки решенија во секојдневниот живот.
-На работилниците учениците со Лего коцки направија еко градови и применуваа многу еко идеи: вградени соларни панели, ветерници, компост за органски отпад, овоштарници и цветни градини, велосипедски патеки и многу други идеи. Лего коцките „патуваат“ низ повеќе училишта во нашата земја и со нив децата учат како да се грижат за животната средина низ игра и забава, информираше наставничката Соња Трифуновска.
