На седницата на Советот на Општина Тетово се изгласа одлука за само една лабораториска чаша доделена од Министерството за животна средина и просторно планирање. Советниците ја прифатија донацијата, со шеговита забелешка дека повеќе вреди хартијата потрошена за точката на дневен ред отколку самата чаша инаку вредна 177 денари.
Одлуката на Советот претставува прифаќање на трајно користење на движни ствари од страна на Министерството за животна средина и просторно планирање на Република Северна Македонија и пренесување на правото на трајно користење на движни ствари на општинското средно медициско училиште „Никола Штејн” – Тетово.
-Со оваa Одлука, Општина Тетово прифаќа на трајно користење движни ствари од страна на Министерството за животна средина и просторно планирање на РСМ, и тоа: Лабораториска чаша, стаклена, 250 мл, 1 количина, единечна цена во 177,00 денари, се вели во член 1 од одлуката.
Министерството за животна средина и просторно планирање на училиштето опремата ја донира како дел од програмата GLOBE Глобално учење и набљудување за доброто на животната средина, и донацијата е дел од тој проект, односно активности кои се спроведуваат од 2010 година.
