Соопштение на ЈУ НП Шар Планина
На 23.07.2024 година, на простор на кој е забрането движење на моторни возила во зоната на строга заштита под врвот Љуботен, техничката служба на Јавната Установа Национален парк Шар Планина, затекна пет крос мотори и едно ATV возило.
Во соработка со полициската станици за граничен надзор ПС за ГН Рогачево, прекршителите беа спроведени до полициската станица во с. Рогачево за понатамошно процесирање во согласност со институционалните надлежности.
Согласно Законот за безбедност на сообраќајот на патиштата, информираме дека на територијата на Национален парк Шар Планина нема определени површини на кои се вршат тест-возења, крос, спортски возења и слично.
Согласно Законот за заштита на природата забрането е движење со моторни возила во природата освен во населени места и на сите видови патишта, уредени патеки и полигони за возење, заради спречување на деградација на природата.
Забраната за движење на сите видови патишта, уредени патеки и полигони за возење во заштитените подрачја се уредува со одлука за режим на движење која ја донесуваат субјектите задолжени за управување со заштитеното подрачје.
За движењето со моторни возила на територија на НП Шар Планина е воспоставен режим на движење со цел да им овозможи мир на дивите животни, заштита на природата и ресурсите во приватна сопственост како и уживање на љубителите на природата.
Патиштата на кои е воспоставен режим на движење се претставени на карта, која е подготвена во согласност со Планот за управување со Националниот парк и Законот за заштита на природата https://www.sarmountain.org.mk/mk/karta-mapa/karta-patista
Локалните жители ќе можат непречено да се движат со моторно возило кон својот имот или бачило, иако се наоѓа на пат на кој е забрането движење на моторни возила, откако претходно ќе обезбедат одобрување од Ј.У.Н.П Шар Планина.
Напоменуваме, во согласност со Законот за заштита на природата, предвидени се прекршочни санкции за правните и за физичките лица кои организираат движење со моторни возила или се движат со моторни возила во природата, освен во населени места и сите видови патишта, уредени патеки и полигони за возење.
Дополнително, ги потсетуваме сите посетители кои се движат со моторни возила во Национален парк Шар Планина, имаат обврска во целост да го почитуваат Законот за возила и да поседуваат комплетна и соодветна документација со себе.
фотографии ЈП НП Шар Планина