Тетовско-гостиварската епархија соопшти дека во Лешочкиот манастир е одбележан одбележан десетгодишниот јубилеј од поставувањето на митрополитот.гЈосиф.
На чествувањето со пригодно слово се обрати поглаварот на Македонската православна црква-Охридска Архиепископија г. г. Стефан истакнувајќи ги заслугите и постигнувањата на Митрополитот г. Јосиф.
Со свое слово од името на свештенсвото на Тетовско-гостиварската епархија пред присутните се обрати и секретарот на епархијата.
-Митрополитот Јосиф за нас неговите соработници и свештеници не е само претпоставен и надлежен архиереј, тој пред сè и над сè е човек, кој е достапен во секое време за нас и за сите наши потреби. Тоа е најголемиот дар за еден свештеник – да има во лицето на својот владика – човек, кој е отворен и кој постојано се грижи и ги разбира своите чеда. Тој негов делотворен, искрен, па би го нарекол и пријателски однос се отсликува и во неговите односи со народот. Неговата отвореност за комуникација со секој еден човек најмногу зборува за неговата способност за да ислуша, за да посоветува, па дури и да помогне не само со зборови, туку и со дела. Тоа негово молитвено смирение, трпението и сочуствителност на моменти најмногу сме ја осетиле ние кои сме присутни во оваа просторија. Но, и покрај неговата монашка душа, заради епархиските и пастирските потреби – тој е човек од акција, грижлив архиереј, добар раководител и набљудувач на сите општествени случувања во нашата земја, порача отец Марјанчо Мадевски,секретар на Тетовско-гостиварската епархија.
Светиот архијерејски синод на Македонската православна црква – Охридска архиепископија, по упокојувањето на Митрополитот Кирил во 2013 година, донесе одлука дотогашната Полошко-кумановска епархија да ја подели на два дела, односно на: Тетовско-гостиварска епархија и на Кумановско-осоговска епархија.
Само неколку месеци потоа Синодот носи уште една значајна историска одлука и за прв Митрополит на новооснованата Тетовско-гостиварска епархија го избира дотогашниот викарен Епископ велички г. Јосиф, чие што митрополитско служење започна со денот на неговото востоличување на 03 ноември 2013 година во Соборниот храм „Свети Кирил и Методиј“ во Тетово.