По втор пат пензионерите од Тетовско организираа јавен протест и блокирање на сообраќајот во градот со цел да го изразат незадоволството од ниските пензии. Повторно околу еден час претпладнево се собраа на крстосницата на булеварите „Маршал Тито“ и „Видое Смилевски-Бато“ и го блокираа сообраќајот.
– Нашето барање е исто, линеарно зголемување од 5000 денари и минимална пензија да биде 20 000 денари. Да се добие подостоинствен живот на пензионерите кои се запоставени. Прв пат по осамостојување на државата пензионерите излегуваат на протести, после 32 години. Многу се ниски пензиите и преку протестите да треба да ги добијат правата. Работна група која работа на создавање на услови и разгледување на барањата нема уште резултати, до крај на месецот ќе излезат со став. А од социјалните мрежи читав премиерот вели дека со закон ќе се регулира со минимална пензија. Линеарно да биде за сите еднакво, изјави Селвер Мемети, претседател на Здружение на пензионери.
Пензионерите велат дека цените на храната се премногу високи и мораат да протестираат за добијат повисоки пензии.
– Во бифе на Владата има најниски цени, за нив, а за нас не. Нека ги извади тие розеви очила. Да го види овој народ кој гладува и мизерува. Оставка за Станка и Тренчевска, изјави Ленче Симовски.
– Министерката, премиерот и претседателот да излезат и да го видат овој народ, да ги видат пензионерите. Тие се главни за сите, како татко на сите деца. Ако ги пушти на улица, значи дека не е способен за нив да ги чува. Пари има нека не нè лажат. Нека седнат, нека ги решат проблемите на пензионерите. Цело Скопје ќе го блокираме. Се чека ден и датум. Шест посто е малку, мора да има за сите за да живеат. Во оваа скапотија не се излегува на крај. Ако не, нека ни ја пратат храната они таму во Собрание што ја јадат, по 30 денари бифтеците. Нека ни ја пратат на нас пензионерите тука. Нека ја поделат низ цела Македонија, а они нека плаќаат по 100 евра да ги видиме, изјави Летка Мишовска.
Пензионерите ќе имаат протести и понатаму.
ас