Историјата на почетоците на скијањето и планинарењето на Шар Планина кои во минатиот век ги овековечил преку фотографии, Гого Попов-Стариот се зачувани за навек во монографијата на авторот Јован Божиноски, претседател на планинарскиот клуб Љуботен.
Вчера беше одржана промоција на монографијата со која се претстави трудот на авторот и клубот кои над 20 години ги собираат сите фотографии и податоци кои Гого Попов ги создал во минатото.
Промоцијата почна со говорот на претседателот на Федерацијата на планинарски спортови на Македонија, Зоран Читкушев кој рече дека монографијата е дело кое заслужува почит и внимание, поради сериозната и долгодишна работа на Божиноски.
„Успева да собере податоци за човекот кој има реализирано високи дострели во активностите кои според нивната содржина се поливалентни. Монографијата станува дел од нашата книжевна меморија и да се збогатиме со информации за луѓе и настани кои во најголем дел ни се непознати, рече Читкушев.
Претставникот на планинарскиот клуб „Љуботен“, Горки Качелов, рече дека клубот наредната година ќе одбележи 100 години од формирањето и затоа е место каде се зачувани значајни артефакти за планинарењето и скијањето, меѓу кои се и на Гого Попов.
Уредникот и дизајнер на монографијата „Гого Попов – Звукот на тишината“, Александра Новеска го пренесе предизвикот како технички да се оформи ова значајно дело.
Промоторот на монографијата, д-р Бранислав Светозаревиќ – Покорни рече дека фотомонографијата има околу 580 фотографии за Гого Попов, со што читателот пред себе има една уникатна книга и дело во кое на маестрален начин авторот Божиноски ја истакнува убавината на фотографијата и мајсторството на Гого Попов како раскажувач на историјата.
Авторот на монографијата „Гого Попов – Звукот на тишината“, Јован Божиноски објасни дека во 2000 година ја организирал изложбата по повод 75 години од ПК Љуботен, слушнал од постарите планинари за важноста на фотографиите на Гого Попов кои ги имаат во клубот. Така се родил мотивот за фотографирање и чување на споменот на историските настани поврзани со планинарењето и скијањето на Шар Планина.
„Ова мое интересирање за фотографија ме врза со оние фотографии кои во клубот ги имаше од Гого Попов и да почнав да ја средувам таа фото-архива на ПК Љуботен. Албум од Гого Попов изработен 1952 година пејзажи од Љуботен до Кораб, е највредното дело на Попов кое се наоѓа во ПК Љуботен. Откако го видов тој албум, почнав да се навраќам на тој период и се обидувам да го доловам моментот што тој Гого Попов го доживувал кога ќе чкрапнел со фотоапарат. Ги овековечил сите моменти, првите организирани движења на Шар Планина, првите планинарски тури, градењето првите објект, први скијачки натпревари, искачувања на некои врвови, се она што денес Шара го нема, истакна Божиноски во своето обраќање.
Монографијата тематски е поделена на три сегменти: Семејство и живот, Фотографија и професија и Планина (планинарење и скијање).
Ѓорѓи Гого Попов е роден 1908 година, а починал 1979 година.
Александар Самарџиев