Од 18 часот дел од тетовските пензионери се собраа на градскиот плоштад јавно да искажат незадоволство и да побараат власта да ги зголеми пензиите. Тие истакнаа натписи со нивните барања, а повеќе пензионери зборуваа за состојбите со кои се справуваат поради ниските пензии.
-Бараме нешто што ни следува. Линеарно зголемување кај сите пензионери за 3500 денари, покачување на минималната пензија на 18 илјади денари, да врати бањско-климатско лекување на пензионерите, да се стават што повеќе лекови на позитивната листа, да нема партиципација при прегледи во здравство. Едноставно работи што навистина ни следуваат, ги повтори барањата Селвер Мемети, претседател на Здружението на пензионери.
Пензионерката Ленче Симовски порача дека младите гледајќи ги проблемите на повозрасните си заминуваат од државата.
-Дали власта не гледа дека секојдневно излегуваме на улици и бараме спас за нашиот достоинствен живот. Денес изјавија дека само 6 отсто можеле да ни дадат. Велат дека пензискиот фонд немал пари. Не е точно тоа. Пензискиот фонд има пари. Прашањето е, каде отишле тие пари. Секојдневно нашите деца и внуци не гледаат како излегуваме на овие протести и не прашуваат дали и ние ќе го доживееме ова. Дали и нас не чека ваква иднина. Затоа тие деца денеска ние бегаат по бел свет. Не бегаат тие од нас, бегаат од системот, се плашат за иднината, истакна Ленче Симовска.
Досега, пет недели по ред, тетовските пензионери се собираат пред објектот на Здружението на пензионери каде јавно ги истакнуваа нивните барања. За прв минатата недела се почнаа вечерни протести и на градскиот плоштад.
ас