Почна процесот на отстранување на остатоците од изгорената модуларна болница во Тетово. За отстранувањето Клиничката болница склучи договор за јавна набавка со приватна фирма. Работници од вчера започнаа со демонтирање на делови од монтажниот објект, а за отстранување на изгорените остатоци се користи и механизација.
Според Електронскиот систем за јавни набавки Клиничка болница Тетово на 25 ноември склучила договор со приватната фирма која треба да изврши отстранување на изгорениот објект на модуларната болница. Вредноста на договорот, односно цената за расчистување на остатоците од изгорениот објект изнесува 354 илјади денари со вклучен ДДВ или над 5700 евра.
Според договорот фирмата е должна да ја изврши работата по добиен писмен налог од болницата во кој ќе бидат вклучени датумот на почеток на работите и рокот за завршување.
За отстранувањето на изгорениот објектот директорот на болницата најави на почетокот на ноември.
-Верувам дека во иднина таму ќе предвидиме една спомен плоча за почит за сите пациенти и на нивните семејства. За понатамошните планови заедно со министерството ќе се координираме што ќе предвидиме во тој дел, истакна директорот Амир Елези во ноември во болницата каде беше извршено примо-предавање на донирана медицинска опрема.
За пожарот во модуларната болница што се случи на 8 септември 2021 осомничени се двајцата поранешни директори, еден доктор и Клиничката болница како правно лице.
Досега почетокот на судскиот процес на три пати се одложува поради разни причини. Следното рочиште е закажано за утре 7 декември во 10 часот.
ас
