По појавата на знамето на Голема Албанија во петокот на концерт кој Општина Тетово го организираше за пречек на косовскиот премиер СВР Тетово најави дека се идентификуваат сторителите, но денес три дена по настанот нема нова инфорамација.
-СВР Тетово во координација со Основно Јавно Обвинилтелство Тетово преземаат мерки за идентификување на сторителите и целосно расчистување на случајот, соопшти СВР Тетово.
Потпретседателот на Движење Беса, Блерим Сејдиу одржа прес-конфренција со партиски став за реакциите на другите политичари по повод посетата на Албин Курти во Тетово, а одговори на новинарските прашања околу појавата на знамето со таканречена Голема Албанија
На новинарско прашање дали за Движење Беса е прифатливо веење на знаме со карта на тн. Голема Албанија, Сејдиу рече дека не преземаат одговорност за публиката. Од друга страна фотографија со ова знаме се најде на Фејсбук профилот на партискиот претседател и тетовски градоначалник Биљал Касами.
-Косовскиот премиер во Тетово беше пречекан со сите државни знамиња и законските постапки, има и слики и видео и можат сите да ги видат тие слики. Тоа што се случува во публиката тоа не преземеме ние одговорности. Сите реакции на државното раководство беа за публиката, а не за пречекот на косовскиот премиер Албин Курти. Пречекан беше според сите законски постапки, рече Сејдиу.
Тој прецизираше дека Општина Тетово го поканила како премиер и поради присуство на таков висок државен функционер биле поставени знамиња пред зградата. За тоа зошто не се сретнал со претставниците на највисокото државно раководство Сејдиу рече дека Курти одлучил така.
-Посетата на Албин Курти беше како премиер и беше пречекан според законските постапки. Премиерот кажа дека како премиер ги поздравува граѓаните во Тетово.Беше во Тетово официјално пречекан според законските постапки. За тоа одлучува премиерот, со кого ќе се сретнат, не сме одговорни со кого и кога еден премиер ќе се сретне со некој друг во Македонија, рече Сејдиу.
За тоа зошто не се инторира државната химна на Северна Македонија Сејдиу рече дека пречекот бил пред општината Тетово, а за понатаму не може да зборува.
Потпретседателот Сејдиу рече дека македонските државни раководители со реакциите откриле национализам кој се криел со демократски јазик.
Според Сејдиу идејата на Албин Курти за засилена меѓусоседска соработка меѓу Бугарија-Македонија, Албанија и Косово има единствена цел за неутрализацијата на многу големото српско ( руско) влијание, кое во последните 20 години растело на Балканот, особено во Република Северна Македонија
-За уште повеќе да ја разбиеме оваа теза, потсетуваме дека проектот „Отворен Балкан“ (стара руска идеја промовирана во Србија со цел да се имплементира на Западен Балкан) ја имаше како модел имплементацијата на рускиот проект „Руски свет „ која беше сличен како оној на „Српски свет“ (Српски свет). Значи, разликата меѓу премиерот на Косово и Владата на Северна Македонија, како што изгледа, е самиот западен концепт наспроти влијанието на српско-рускиот концепт врз нас. Затоа реакциите се толку хистерични од нашите владетели во Северна Македонија. Но, всушност, овој момент истакнува нешто друго! Секогаш кога се Албанците во прашање, македонската политика (позиција и опозиција) стануваат исти и не се разликуваат во ставовите. Државата на Косово и народот на Косово никогаш не го попречиле или оспорувале развојниот пат на Северна Македонија, но имало други кои ја попречувале Северна Македонија, како што е Србија која ја оспори Македонската православна црква, како што е Грција која го оспори името и не принудувал да го смениме Уставното име на државата, како што денес Бугарија не принудува да го смениме Уставот поради спорот со македонскиот национален и историски идентитет, смета Сејдиу.
Партискиот потпретседател понатаму рече дека албанските политички партии и во овие случаи молчат, само да не ја ризикуваат својата позиција во власт.