Врвот Љуботен на 2499 метри надморска височина е првата дестинација за членовите на планинарскиот клуб во првите денови од секоја нова година. Ова искачување на Љуботен се направи вчера на христијанскиот празник Свети Игнат, за кој, според народните верувања, тоа што ќе се прави тој ден, ќе се работи цела година.
-Во текот на вчерашниот ден, членови на планинарскиот клуб Љуботен во променливи временски услови проследени со силен ветер традиционално се искачија на врвот Љуботен и со тоа симболично ја отворија шарпланинската порта. Ова искачување за Љуботенци има големо значење бидејќи со тоа го означуваат почетокот на Новата година и отворање на едно ново планинарско патешествие кое ќе биде исполнето со радост и убави моменти, изјави Славко Костовски од ПК Љуботен која ја водеше турата до врвот.
Планинарскиот клуб веќе има годишна програма според која ќе се реализираат искачување, акции, тури и другите активности. Годинава новитет е тоа што ќе бидат домаќини на меѓународна планинарска средба.
-Реализацијата на планинарските тури се одвива според годишна програма која предвидува многу искачувања кои претежно ќе се одвиваат на шарпланинските врвови, но и на највисоките планински точки во Македонија и други земји. Следниот период предвидени се зимски искачувања на Црн Врв, Бруставец и Враца. Исто така вредно е да се напомене дека годинава планинарскиот клуб Љуботен е домаќин на 26-ти Балканските планинарски средби кои ќе се одржат во првата недела на месец јуни 2024 на Попова Шапка.
Запишувањето на нови членови е штотуку започнато и истото може да се изврши во просториите на ПК Љуботен или електронски со пополнување на пријава и доказ за уплатена членарина.
А.С
фото ПК Љуботен