Воениот оркестар на АРМ утревечер ќе настапи во Тетово, како специјални гости на градската свеченост по повод 79 години од ослободувањето на Тетово, како последен ослободен град во државата – со кој се заокружува ослободувањето на Македонија. Настанот утре ќе се одржи во ЦК „Иљо Антески – Смок“ со почеток во 19 часот.
Како новитет, покрај воениот оркестар, премиерно во Тетово ќе настапи и балетот на Државното музичко-балетски училишен центар „Илија Николовски Луј“ од Скопје, заедно со голем број на специјални гости и изведувачи.
Организаторите најавуваат досега најбогата и најразновидна програма, со голем број на учесниците. Од минатата година, на оваа градска свеченост се врши и доделување на награди за поединци и групи кои имаат остварено неспорен придонес во повеќе области, како и признанија за животно дело.
За потсетување, повторното свечено одбележување на овој значаен настан беше вратено во 2019, откако речиси 15 години изостана организирана активност за достојно одбележување. Настанот е во организација на Сојузот на борци од Тетово, во соработка со голем број на поединци и групи кои учествуваат во одбележувањето.
