Општина Тетово упати повик до граѓаните кои сакаат да донираат со насоки за кој вид на донации се најпотребни за подрачјата погодени од земјотресот во Турција и Сирија. Листата е утврдена со договор на општината со Амбасадата на Турција, како и Заедницата на единиците на локалната самоуправа (ЗЕЛС) и Црвениот крст.
Засега најпотребни се финансиски средства . Исто така, утврдена е и листа на барани материјали, а како најпотребни барани материјални средства од страна на настраданите, приоритет имаат: шатори, ќебиња и греалки. Од зимска облека потребни се јакни, мантили за дожд, чизми, џемпери, панталони, капи. Друг вид материјали покрај шатори, ќебиња и греалки, потребни се и кревети, душеци, вреќи за спиење, конзервирана храна, детска храна, детски пелени, средства за чистење и хигиена, се вели во соопштението на Општина Тетово.
Во Тетово граѓаните може да ги остваат донациите на градскиот плоштад и спортската сала на гимназијата „Кирил Пејчиновиќ“ од 10 до 18 часот како два собирни пунктови.
-Апелираме до сите кои имаат можност, да ја покажат својата хуманост и да донираат за турскиот и сирискиот народ. Сега им требаме на Турција и Сирија. Да се солидаризираме и да помогнеме што поскоро да се надминат овие тешки денови, потенцираат од Општина Тетово.
Отворена е и жиро сметка на која граѓаните на Северна Македонија и дијаспората можат да помогнат со финансиски средства. Воедно Општина Тетово ќе одвои еден милион денари помош за подрачјата погодени од земјотрес во Турција и Сирија.
ас
