Месната заедница од Вратница испрати ново соопштение до јавноста по вчерашниот допис на инвестирот компанијата Трибека Хидро.
-Ни го дадовте вистинскиот збор кој ни недостигаше во досегашните наши реакции. Водата за нас буквално ќе исчезне. Водата што понира од реката ќе се стави во цевка во должина од 2 км над изворите за вода за пиење на Орашје, така што во моментот кога ке се испушти во коритото од реката е практикно, неупотреблива и бескорисна и за Вратничани и за Орашаани и за Староселци.
Го игнорираат фактот дека на средина од планираниот цевковод сега се наоѓаат двата зафати на вода за каналите за наводнување за Вратничко и Орашко поле и за полнење со вода на вештачкото Вртаничко езеро. Во проектот никаде не е споменато како и со што овие две полиња и езерото во иднина ќе се снабдуваат со вода. Покрај тоа, индирекно е загрозено и нашето снабдување со вода за пиење, затоа што во недостаток на вода во каналите, за наводнување на земјоделските површини, бавчи, дворови и потребите од техничка вода ќе се користи водата од селските водоводи, кои за зал имаат мала издашност која едвај ги задоволува сегашните потреби.
За биолошкиот минимум, кој патем никаде не пропишан со закон, сите познавачи како тоа изгледа во реалниот живот многу добро знаат дека е само обична фарса и дека во река понорница, каква што е Вратничка река, го има само 10 метри од зафатот. Тој, под услов да се испушта, едноставно понира и практично во наредните 2 километри го нема.
Ако ова не се аргументи доволни за стопирање на проектот, односно, одземање на нашето елементарно човеково право за користење на вода за пиење и за наводнување кое е јасно пропишано во приоритетната листа во Законот за води на Република Северна Македонија, тогаш не ни преостанува ништо друго, освен сериозно да размислуваме за отселување од нашите родни огништа и одење во белиот свет каде што ова елементарно човеково право ќе ни биде овозможено, се вели во сооопштението од месната заедница од Вратница.
