Координаторот на советничката група на ВМРО ДПМНЕ Ангел Карапетров го осуди вчерашното однесување на Општина Тетово и побара почитување на македонскиот јазик и македонскот народ.
-Ќе повториме, ние како политичка партија на ВМРО-ДПМНЕ ги повикуваме институциите на Република Македонија предводени од СДСМ и ДУИ да превземат мерки веднаш и да постапат според Уставот и постојните важечки закони во врска со поставувањето на билборди само на албански јазик. Вчерашниот начин за пречек на претседателката на Косово не беше во духот на Рамковниот договор, а со кој договор акцент е ставен токму на македонските мултиетнички општини, особено тука во тие општини да постои соживот и взаемна почит помеѓу етникумите. Во ниту еден момент, не треба да се заборави дека Тетово е град во Република Македонија, град во кој освен македонци живеат и други етникуми. И не треба да се игнорира фактот, дека како на цела територија на Република Македонија, така и во Тетово официјален службен јазик е македонскиот.
Истовремено, сакаме да ја поздравиме добрата соработка помеѓу Р.Македонија и Р.Косово. Сметаме дека е добро да градиме добрососедски односи. Меѓутоа, остро се спротиставуваме на злоупотребата на Уставот и законите на Република Македонија. Вчерашниот настан не враќа 20 години назад, наместо ние, својата енергија да ја насочуваме кон борба за подобра економска стабилност на државата, кон борба за сузбивање на криминалот и корупцијата, борба за владеење на правото и правна држава и заедничко унапредување на Република Македонија на патот кон Европската унија. Тој пат се гради само со взаемна почит.
Почитуван градоначалник, Македонците во Тетово бараат доследно спроведување на Рамковниот договор. Тие гласаа за вас и ви ја дадоа својата доверба и поддршка на локалните избори, со чија помош победивте. Македонците кои го дадоа својот глас за Вас, се надеваа дека ќе видат поразличен градоначалник од вашата претходничка. Македонците во Тетово, искрено се надеваа дека ќе бидете градоначалник на сите граѓани. Не ги нарушувајте добрите меѓуетнички односи собирајќи ситни политички поени. Должни сте да го почитувате македонскиот јазик и македонскот народ. ВМРО-ДПМНЕ како политичка партија за која гласаат огромно мнозинство од македонците ви даваме поддршка, но таа не е безусловна! Искрено се надеваме дека ќе ги увидите грешките, и во иднина нема да се повторуваат!