Митрополитот тетовско-гостиварски г. Јосиф кој беше дел од државно-црковната делегација во Ерусалим каде се појавува Благодатниот оган, вечерва Огнот го носи и во Тетово.
Во 21.30 часот се очекува пристигнувањето во храмот Свети Кирил и Методиј во Тетово, а во 23.20 започнува трикратниот опход на црковниот објект по што се очекува радосната веста за Христовото Воскресение-Велигден. Владиката г. Јосиф ќе служи Воскресна литургија носејќи го благословот од Ерусалим за македонскиот народ.
Македонско државно и црковна делегација присуствуваа на појавувањето на Благодатниот оган во базиликата Свет Гроб во Ерусалим, а потоа и лично презедоа Оган од Ерусалимскиот патријарх, како благослов за верниците во нашата држава и нашата православна црква, МПЦ-ОА.
Државната делегација во Ерусалим ја предводи министерот за внатрешни работи Оливер Спасовски, а во состав се министерката за култура Бисера Костадиновска-Стојчевска и директорот на Комисијата за односи со верските заедници и религиозни групи, Даријан Сотировски.
Во црковната делегација се повеќемина свештени лица предводени од шефот на делегацијата на Македонската православна црква – Охридска Архиепископија, Митрополит Тетовски-гостиварски, г. Јосиф.
