Во организација на Унијата на жени на ВМРО ДПМНЕ ОК Тетово, по повод кампањата „16 дена активизам за борба против насилство врз жените и девојчињата“ се одржа трибина и проекција на филмот „Што е жена“. Анита Бошкоска Јованоска претседателка на Унијата на жени истакна дека активноста се реализира вечерва на 12 ден од кампањата 16 дена активизам против родово базирано насилство.
– Оваа кампања има цел да ја подигне општествената свест и да поттикне на размислување за индивидуалност и колективен придонес во борбата за справување со насилството врз жените и девојчињата. Во светски рамки, секоја трета жена е жртва на семејно насилство. 14% проценти од жените, со наполнети 15 години, биле жртви на физичко или сексуално насилство од страна на партнерот или друго лице. Околу 44% од жените биле жртви на психолошко насилство од партнерот. Три од 10 жени биле жртви на сексуално вознемирување, истакна Анита Бошкоска Јованоска.
Многу мал процент од жените го пријавуваат насилството во полиција, или пак се осмелиле да побараат институционална помош.
– Како причини за тоа се наведува: срам кај жртвите, нивна финансиска зависност, недоверба во институциите и страв на жртвите од одмазда. Само 2% од жртвите ги пријавиле најсериозните инциденти во полиција. Насилството врз жените и девојчињата е една од најчестите повреди врз човековите права и има долгорочни последици врз животите на жртвите, нивните семејства, заедницата и воопшто, во општеството. Затоа, вечерва сите ние заедно испраќаме јасна порака за нулта толеранција на родово базираното насилство. Да запомниме што е важно! Важно е да се обединиме за сите жени, истакна Анита Бошкоска Јованоска.
Со минута молк и се оддаде почит на убиената ученичка 14 годишната Вања Ѓорческа и сите жртви на родово базираното насилство.