Во тетовската црква „Света Богородица“ се одбележа празникот Водокрст, ден пред Богојавление Водици. По светата литургија, митрополитот г. Јосиф во црковниот базен во дворот во црквата сизврши Водосвет и спуштање на Светиот крст. По крстот скокнаа тројца верници, 36 годишниот Димитар Спасески, неговиот врсник Љубиша Јовановски и 28 годишниот Александар Стефановски. Најуспешен и најсреќен беше Димитар.
– Прв пат се фрлам по осветениот крст и прв пат успеав да го фатам, но десет години се пријавувам. Господ да дава здравје, бериќет и убавина на сите. Младите да бидат повеќе активни во црквите, изјави 36 годишниот Димитар Спасески.
Традицијата за Голем водосвет и спуштање на осветен крст во црковен базен е започната во 1986 година. Изграден бил нов базен со донација на Мишко Васовси, иселеник од населбата Горно маало каде што се наоѓа црквата во Тетово во САД.
-Од тогаш редовно се организира на Водокрст, спуштање на крстот во осветените води. Со благослов на сега покојниот владика Кирил, дозволи на 18 да се одржи традицијата. Тој посочи тогаш дека исто е значењето Големо осветување или Голем водосвет може да се прави и на Водокрст. Две години немавме организирано само во 2001 и 2021 поради пандемијата. Но инаку има народ, изјави Небојша Неделковиќ, од црковен одбор на Света Богородица.
Митрополитот на тетовско-гостиварската епархија господин Јосиф по празничната литругија во својата беседа го истакна значењето на празникот, денот кога се осветуваат водите, а воедно ги поучи верниците како правилно треба да ја употребуваат светата вода.
Единствено во Тетово чинот на спуштање на крстот се извршува и на празникот Водокрст, односно еден ден пред Водици. Утре на Водици централното одбележување е во соборната црква Свети Кирил и Методиј каде осветениот крст ќе се спушти во црковниот базен по празничната литургија околу 9 часот и 30 минути.
ас