Носителот на листата со кандидати за советници од редовите на коалицијата предводена од СДСМ во Тетово, Глигорије Стојановски порача до граѓаните дека кампањата која помина биле големо задоволство, лично искуство и можност за директно соочување со нив.
-Помина цела кампања за избор на Советници во нашата општина. Ова е моја прва кампања, и со задоволство можам да се пофалам дека ова за мене претставуваше едно мое лично, големо животно искуство.
Директно и непосредно бев со вас – граѓаните на мое Тетово. Имаше низ кампањата многу насмевки, ветувања, поздравувања, анегдоти, и секоја средба, со секого поединечно, беше своја приказна. Заеднички низ смеа знаевме да си ги кажеме маките кои нè тиштат и опкружуваат.
Знаеме, и сме свесни дека нашиот град Тетово има многу специфичности. За да се вложиш во неговото унапредување не е само привилегија туку и обврска. Вие, ми дававте сила низ целата кампања да станам уште поодлучен во намерата. А, намерата ни е јасна. Тетово да продолжи да се гради инфраструктурно, да се развива од сите аспекти на општественото живеење, и сето тоа во духот на мултиетничноста.
Јас, како социјален работник и дел од културата во Тетово, можам само да ви гарантирам дека максимално ќе се трудам да ги исполнам заложбите за кои ви говорев.
Затоа, ве повикувам сите до еден, да ја искористиме заедничката можност и Тетово да го направиме место за пофалба и респект. Мора да ја промениме досегашната бледа слика на градот.
Таа можност ќе ја овозможиме само доколку на 20ти август излеземе масовно, и гласаме за бројот 1. Тука сум за вас. Нека европско Тетово го почувствуваме сите, порача Стојановски.
