По две години пауза се организира Бадникарска поворка низ тетовските улици, а заинтересираните родители нивните деца може да ги донесат во соборната црква Свети Кирил и Методиј во петок 6 јануари. Од 10 часот и 15 минути ќе започне Бадникарската поворка.
-Возљубени браќа и сестри со благослов на Митрополитот Тетовско-гостиварски г. Јосиф, после литургијата во Соборниот Митрополитски храм Свети Кирил и Методиј во Тетово на 6 јануари, петок, со почеток во 10 и 15 часот ќе започне Бадникарската поворка. Поворката ќе започне од Соборниот храм, а ќе заврши на плоштадот во Тетово, каде што ќе настапува триото Шербет. Во пресрет на Рождеството Христово Ве покануваме да ги донесете Вашите деца и учеството да биде што помасовно. На тој начин и сите ние ќе учествуваме во радоста на Витлеемската ноќ и заедно со ангелите ќе пееме : „Слава на Бога во Висините, а на земјата мир и меѓу луѓето добра волја“, порача епархискиот ѓакон Илија Деспотовски.
Бадникарски поворки ќе се одржат во Брвеница и Вратница. Во Тетово прв пат се одржа бадникова литија во 2017 година, а не се одржа во 2021 и 2022 поради пандемијата. Во 2021 заинтересираните оставаа писмени молитви и честитки.
Песната Вечниот Бог
Вечниот Бог слезе и во Дева се всели Царот на сите и Господ, дојде Адам да го преобрази; Луѓе радувајте се, играјте, ангели веселете се; Прими Го Витлееме Господ твој, Царот на сите и Владика; Мудреци од Исток доаѓаат, дарови да принесат достојни; Да се поклонат на Господа, во пештера родениот; Кога слушна Ирод за настанот, целиот се потресе злобниот; Вака вели на свештениците, кои Му служат на Господа; Кажете ми мудри учители, каде треба Он да се роди; Обземен од бура на помисли, Јосиф намисли да Ја отпушти; Ноќта, пак, во сонот слушна глас, ангел Господов му проговори; Денес сета твар да се радува, нек҆ торжествува и се весели; Светлина на светот му засветли и тие во мракот ги осветли; Сите на Христа да Му пееме, Он заради нас се воплоти; О, Дево, Мајко, Владичице, спаси ги христијаните
