Тетовските пензионери во понеделник ќе одат во Скопје за да дадат поддршка на масовниот протест на пензионирани луѓе кои бараат зголемување на пензиите. И денес пред објектот на Здружението на пензионери јавно го изразија револтот од ниските пензии.
– Во понеделник се оди во Скопје, ги молам сите пензионери кои се можност во 9.30 да си дојдат пред Веро за да одиме на протест во Скопје. Имаме доста потписи, без разлика на националност кои даваат поддршка а за покачување на малите пензии, овој живот е многу тежок живот. Не се преживува со 12 илјади. Како што ќе биде минималната плата да биде и минималната пензија, изјави Летка Мишовска.
Овој пат тие почнаа и да собираат потписи од пензионерите со цел и на тој начин да ги поддржат барањата за поголеми пензии.
-Бараме како и сите линеарно покачување на пензии, потоа бараме за на позитивна листа да се стават лекови кои многу ги досега ги немало, а пензионерите не се во можност да ги набават, поради високите цени. Собираме потписи да видат колку има незадоволни пензионери поради ова процентуално зголемување, што сметаме дека е ништо во однос на нивните покачувања од 78 посто. Редно беше да се слушне и гласот на пензионерите, изјави Дивна Зафировска.
Во Тетовско има околу 13 илјади пензионери.
