На Бадник на 6 јануари 2024 година ќе се организира Бадникарска поворка во Тетово, информираат од Тетовско-гостиварската епархија.
Поворката ќе тргне од Соборниот храм „Свети Кирил и Методиј„ во Тетово веднаш после завршувањето на Светата Божествена Литургија во 10 часот и ќе се движи кон градот, а ќе заврши на плоштадот каде е предвидена празнична програма со пеење на Божикни песни.
-Еве и ова 2024 лето Господово, Господ не удостои, да им се приближиме на Божикните празници и да го прославиме раѓањето на Витлеемскиот Богомладенец Христос. Во таа насока, а држејќи се до веќе воспоставената традиција Ве известуваме сите православни христијани дека на 06.01.2024 година, со благослов на Митрополитот Тетовско-гостиварски господин Јосиф, ќе се организира Бадниковата поворка. Ги повикуваме сите православни родители да ги донесат своите деца и на тој начин да искажеме почит и љубов кон Христос нашиот Господ. Да се обратиме со искрена молитва кон Богомладенецот и ние заедно со ангелите да ја пееме рождественската песна: “Слава на Бога во висините, а на земјата мир и меѓу луѓето добра волја“, информираа од епархијата.