Жители на Тетово се собраа пред зградата на Основен суд во знак на поддршка на д-р Бобан Вучевски,еден од обвинетите за пожарот во тетовската модуларната болница во кој животите ги загубија 14 луѓе во септември 2021 година. Граѓаните се собраа пред денешното продолжување на судскиот процес кој започна на 7 декември.
Дел од насобраните граѓани во изјави за медиумите истакнаа дека дошле да му дадат поддршка на докторот, сметајќи дека неправедно е обвинет. Според граѓаните за пожарот не постои лекарска вина и нема логика доктор да одговара за пожар.
-Јас не сум да се амнестираат виновници, но вистинските виновници не се кријат овде денеска во судот, тие треба да се најдат таму каде што се. Да се работи за лекарска грешка во ред, тука не се работи за лекарска грешка, за техничка грешка се работи за која треба да одговора некој друг, а тој друг се знае кој е, тоа се авторите на овие објекти што ги дигаат низ Македонија, изјави жител на Тетово.
-За време на кризата која демнееше над сите нас, тој го даде својот максимум и покажа како треба еден доктор да изгледа, човек кој се грижи за граѓаните. Обвинителтството да размисли за своите предлози, изјави друг жител на Тетово.
-Собрани сме за поддршка на д-р Вучевски, тој беше 24 часа достапен за време на корона кризата.Тој нема никаква вина, затоа што вината не е докторска, туку е техничка, рече жителка на градот.
За пожарот во модуларната болница покрај д-р Вучевски обвинети се двајцата тогашни директори Флорин Бесими и Артан Етеми и Клиничка болница како правно лице.
ас