Публицистот Душан Синадиновски ја издаде книгата насловена „Леген-град генеза на неговиот идентитет“. Овој труд има цел да објасни како настанало преданието во кое се раскажува дека Лешок бил град и се викал Леген.
-Целта на овој труд е да се открие вистината за постанокот на тоа предание. Бидејќи за Леген постојат неколку епски песни и за неговиот идентитет постојат голем број забелешки и текстови, во овој труд истовремено е направен еден поопширен прегед на историската литература посветена на овој епски град. Разгледано и образложено е се она што е кажано на оваа тема има и што мене ми беше достапно. Тука се опфатени авторите Пејачевиќ, Пејчиновиќ, Јуришиќ, Копитар, Јагиќ, Шафариќ, Новаковиќ, Хаждеу, Стоилов, Костиќ.. и други кои со своите текстови дале придонес кон откривањето на идентитетот на Леген. Мојата искрена надеж е дека со оваа книга успеав да го извадам на виделина придонесот на Кирил Пејчиновиќ за идентитетот на Леген. Се надевам дека таа историска неправда ќе биде исправена во негова корист, вели авторот Душан Синадиновски.
Авторот е роден 1949 во тетовска Вратница, а живее и работи во Детроит во Соединетите Американски Држави. Тој е магистер по политичка филозофија и публицист, еден од двајцата автори на познатата Вратничка енциклопедија.
ас