Општина Јегуновце денеска одбележа 26 години од конституирање на првиот Совет и воедно формирање на општинската единица на локална самоуправа. Советот е конституиран на 18 декември 1996 година.
-Во знак на благодарност доделив благодарници за особен придонес и промоција на општина Јегуновце на истакнати спортисти и млади кои беа симболично финансиски наградени како знак на благодарност за постигнатите резултати и промоција на општина Јегуновце. Сите заедно, јас како градоначалник, Советот, граѓаните, институциите имаме обврска и потреба заеднички да работиме, да носиме одлуки за подобрување на животот на сите нас кои живееме во населените места во Општина Јегуновце. Сакам да упатам благодарност до сите чинители кои придонесоа Јегуновце денес да биде локална самоуправа и институција што ги решава проблемите на граѓаните, информираше градоначалникот Димитар Костадиноски.
Според пописот од 2021 година Јегуновце има 8.895 жители од кои Македонци 4.746, Албанци 3.482 Роми 49, Срби 89, други неспомнати 22 и лица за кои податоците се преземени од административни извори се 398. Општината брои 13 населени места.
