Изгорениот смет на депонијата кај тетовска Волковија осми ден по почнувањето на пожарот сè уште предизвикува чад и ширење на непријатна миризба.
Жителите на Волковија се најблиску до оваа локација и велат дека имаат проблеми поради чадот и смрдеата.
– Непријатната миризба и чадот не се кИако дента на пожарот, но сè уште се чувствува и е тешкотија за дишење, велат мештаните.
Дека продолжува да чади од изгорениот смет сведочат и денешните фотографии и видеоснимки направени од воздух со употреба на дрон од страна на меѓународната телевизиска мрежа Ал Џезира.
Од Територијалната противпожарна единица (ТППЕ) Тетово информираат дека сите овие изминати денови по потреба интервенирале кај запалениот смет.
– Таму продолжува закопувањето на сметот во земја, а по потреба одиме и ние да интервенираме. Сме праќале по еден камион-цистерна за да направи некоја интервенција, информира Авни Амети од ТППЕ Тетово.
Пожарот избувна на ноќта помеѓу 21 и 22 август. Државниот инспекторат за животна средина на крајот на минатата недела донесе решение со кое се изрекува парична казна за фирмата ДТУ „Еко Ливинг“ ДООЕЛ Чегране за пожарот што се случи на таа локација.
Фирмата доби платни налози за правното (9000 €) и физичкото лице (500 €), а со решение е задолжена комуналниот отпад од локацијата што се запали во рок од 90 дена да го однесе на депонијата Русино.
-Треба комплетно да се изгаси, а потоа во рок од 90 дена треба да се однесе сметот во Русино. ДИЖС ќе прави контролни надзори, информираше директорот Сретен Стојковски.
Државниот инспекторат изрече забрана на фирмата да носи комунален отпад на истата локација.
ас
