Од утре започнува Великиот Велигденски пост. Според типикот пропишан од Света Православна Црква, Велигденските пости кои се востановени во чест а најголемиот празник Воскресение Христово се постат на следен начин од понеделник до петок на вода, строг пост додека сабота и недела е благословено употреба на масло и вино. Ублажување на постот е допуштено уште во неколку денови односно на 9 и 22 март како и риба за празниците Благовештение и Цветници.
Денеска на 26.02.2023 година, во Сиропусната недела, во соборниот храм Пресвета Богородица-Гостивар, беше отслужена света архиерејска Литургија, на која чиноначалствуваше Неговото Високопреосвештенство Митрополитот Тетовско-гостиварски г.Јосиф.
Во својата беседа за Сиропусната недела и почеток на Великиот пост митрополитот г.Јосиф меѓудругото нагласи: Својата беседа ќе ја започнам со извадок од словото за сиропусната недела од светиот отец наш Климент, архиепископ Охридски Чудотворец:
-„Ете, се наближија деновите на Чесниот пост, во којшто сакаме да ги спасиме своите души. Само да ги оставиме лошите дела, лукавите помисли, и сѐ што сме згрешиле во текот на годината, или во блуд, или во лага, или во клевета, или во пијанство, или во кое било лошо дело, сите нив сега на ѓаволот да му ги префрлиме, да појдеме во светиот храм и со топли солзи да си спомнеме пред Бога за своите гревови, за кои ќе одговараме во страшниот ден, кога сите ќе застанеме пред Господа Бога. Да Му се молиме на Бога со чисто срце, и гнев да не држиме против своите непријатели”
Владиката во беседата потоа посочи : Денес браќа и сестри повторно се отвора вратата на четириесетдневниот велигденски пост, кој за нашата душа претставува предвесник на духовната пролет, овенчана со различни благопријатни и добродетелни мириси. Како што на доаѓањето на пролетта се радува целата од Бога создадена природа, така и на доаѓањето на постот се радува целата наша душа, зашто од денес таа ќе се украсува со милоста и љубовта, со простувањето и покајанието, како што и Спасителот Христос ни порачува во Евангелието.
Без овие добродетели, нашиот пост и не може да се нарече вистински пост, туку само едно обично и празно лицемерие, кое нема да донесе никаков плод.Сега, кога настапува Великиот пост, потребно е со очистени срца од секакво зло, да се поучиме од зборовите на Господа: „Aко им ги простите на луѓето гревовите нивни и вам ќе ви ги прости вашиот Отец небесен; aко, пак, не им ги простите гревовите на луѓето, и вашиот Отец нема да ви ги прости вашите”.
Нека Господ Бог биде нашиот сопатник во деновите кои ни претстојат за достојно да го дочекаме светлото Христово воскресение. Амин, истакна владиката.
Велигденскиот пост има свои посебни подготвителни недели. Постојат четири подготвителни недели (седмици) пред Великиот постот, а тие се: Неделата на митарот и фарисејот (за смирението), Неделата на блудниот син, Недела месопусна и Недела сиропусна.
