СВР Тетово во соопштението за евидентирани настани и пријави информира за наоѓање на 40-годишник од Скопско кој бил пријавен за исчезнат. Приведени се неколку лица поради најдена дрога, нелегален престој и за издржување на затворска казна.
Полициски службеници на СВР Тетово завчера (10 октомври) на улица „Благоја Тоска“, во близина на стариот градски стадион во Тетово, го пронашле 40-годишниот С.П. од скопско Црешево, кој на 9-ти овој месец бил пријавен дека се оддалечил од неговиот дом. По пронаоѓањето, С.П. вчера (11 октомври) околу 15 часот им бил предаден на неговите најблиски.
Полициски службеници на СВР Тетово, вчера (11 октомври) околу 17 часот и 5 минути, на улица „Браќа Миладинови“ во Тетово го лишиле од слобода 19-годишниот А.П. од тетовски Челопек затоа што при преглед му била пронајдена марихуана. Тој бил задржан во Полициската станица Тетово и по целосно документирање на случајот ќе му биде изготвен соодветен поднесок.
Вчеравечер (11 октомври) околу 22 часот, полициски службеници на СВР Тетово, во тетовско Горно Палчиште, го лишиле од слобода Ф.С.(30) од тетовска Голема Речица затоа што при негов и преглед на патничко моторно возило „фолксваген пасат“ со тетовски регистарски ознаки, во кое бил сопатник, му била пронајдена марихуана. По документирање на случајот против Ф.С. ќе следува поднесок по член 215 од Кривичниот законик.
Вчера (11 октомври) околу 19 часот и 30 минути во казино на улица „Илинденска“ во Тетово, полициски службеници на СВР Тетово го привеле 49-годишниот М.Х. од Република Албанија, кој непријавено престојувал на подрачјето, по што бил задржан во Полициската станица Тетово за натамошна постапка.
Полициски службеници на СВР Тетово вчера (11 октомври) околу 17 часот и 35 минути, на улица „Ленин“ во Тетово, со судска наредба го привеле 49-годишниот тетовец Н.А. за издржување затворска казна во Казнено-поправната установа Затвор „Тетово“ во Тетово, каде набргу бил спроведен.