Со премиерен настап вчера во Тетово се претстави градскиот детски мешан хор „Крешендо“ кој го сочинуваат деца на возраст од шест до 15 години. Од почетокот на март до сега 80 деца под раководство на диригентките м-р Фотини Георгиадис Кировска и проф. Марија Пулковска Здравковска вежбаа десетина композиции кои ги изведоа пред тетовската публика во Центар за култура „Иљо Антески-Смок“ во Тетово.
„Многу е убаво кога желбата станува реалност. Идејата за формирање на детски хор ни се роди пред една година и еве тој хор постои веќе четири месеци и вчера го имавме својот премиерен настап. Задоволни сме од сработеното затоа што тоа е макотрпна работа и за тој краток период постигнавме доволно за да и се претставиме на прекрасната тетовска публика, чија поддршка многу ни значи, вели Фотини Георгиадис Кировска.
Предизвикот на двете диригентки беше како децата со различна возраст и вокални можности заедно да ги исполнат песните.
„На помалите деца им беше потребна поголема посветеност, како учителката со првачињата да ги научи на трпеливост, ред и да почне од буквата А. На поголемите им треба малку поинаква посветеност, а на крајот од сето тоа да направиш една целина. Со многу проби и вежби децата имаа можност и вокално да напредуваат, истакна Марија Пулковска Здравковска
Специјалниот гостин Влатко Лозаноски вчера настапи заедно со децата од „Крешендо“. Од десетте песни, две беа познатите хитови на македонскиот пејач.
„Доста внимание посветивме на репертоарот и изборот на песните. Сакавме тоа да се познати песни ама сепак со наш печат. Затоа на сите им направивме сопствени аранжмани, а за тоа најзаслужен е проф. Ираклис Георгиадис кој многу ни помогна во тоа. Оркестарот ни помогна да ги збогатиме композициите и настапот да биде комплетен, велат Фотини и Марија.
Првиот јавен настап на детскиот мешан хор Крешендо беше музичко шоу надополнето и со настапите на балерините од балетското студио Менада од Тетово. „Крешендо“ продолжува со работа по летниот распуст, па ќе има нови прилики за концерт.
ас