Вчера (26 април) од 8 до 13 часот на подрачјето на Секторот за внатрешни работи Тетово спроведена е акциска контрола на возила кои вршат јавен превоз на патници, претежно автобуси и такси-возила.
При контролата биле откриени и санкционирани 7 технички неисправни возила (ТЕ-5 и ГВ-2 ). Пет од нив (ТЕ) имале неисправни сопирачки, а 2 (ГВ) неисправни други уреди (1) и неизвршен технички преглед (1). Технички неисправните возила веднаш се исклучени од сообраќај, на возачите изготвени им се законски предвидените поднесоци и ќе се соочат со парични глоби кои за овој вид сообраќаен прекршок, согласно Законот за возила, изнесува 400 евра во денарска противвредност.
При контролата, исто така, констатирани и 12 други видови прекршоци (ТЕ-6 и ГВ-6) за кои биле поднесени соодветни поднесоци.
Секторот за внатрешни работи Тетово уште еднаш ги потсетува возачите кои се учесници во јавниот превоз навреме да ја проверат техничката исправност на возилата кои ги управуваат и да не ја доведуваат во ризик нивната и безбедноста на другите учесници во сообраќајот.