Советничката група на ВМРО ДПМНЕ активно учествуваше да се овозможи фудбалските клубови од Тетово повторно да играат натпревари на тетовскиот Градскиот стадион, што беше реализирано во саботата 4 ноември кога прволигашката екипа ЖФК Љуботен го играше натпреварот од редовното 10-то коло, вели во соопштение до јавноста советникот Ратко Давидовски.
Тој вели дека дописот до јавноста го пишува како израз на задоволство што советничката група со претставници на општинската власт и фудбалски клубови по неколку состаноци успеа да договори користење на најголемиот фудбалски стадион во Тетово.
– Откако на почетокот на сезоната фудбалските клубови Тетекс, Љуботен и ЖФК Љуботен го поведоа прашањето зошто општината не им дозволува да играат на Градскиот стадион во Тетово, тоа беше надминато во саботата 4 ноември. Како советник од редовите на ВМРО ДПМНЕ, но и како повремен дел од медицинската екипа на ЖФК Љуботен имам уште поголемо задоволство и чест јавно да информирам за надминувањето на големо прашање, важно за фудбалските екипи Љуботен, ЖФК Љуботен и Тетекс. Советничката група на ВМРО ДПМНЕ активно учествуваше да се овозможи одигрување на натпреварите на Градскиот стадион, со активно договарање со градоначалникот и со надлежните претставници од Општина Тетово како и фудбалските клубови. Со неколку конструктивни состаноци сите ние, како граѓани покажавме и докажавме, дека на спортот местото му е на спортските терени, и дека спорот е над сите нас, над политиката и ги обединува граѓаните, вели советникот Ратко Давидовски во име на советничката група на ВМРО ДПМНЕ Тетово во дописот до Тетово инфо.
Во натпреварот од 10-тото коло ЖФК Љуботен во саботата натпреварот со Тиверија го доби со високи 4-0.