Граѓанската иницијатива „Тетово сака парк“ со предлог за засадување на над 1000 нови дрвја на територијата на општина Тетово, особено на градските улици кои располагаат со таков потенцијал, што би довело до поздрава средина, почист воздух и естетски среден град. Покрај основното барање за прв градски парк, ова е уште еден предлог на иницијативата.
-Голем број од градските улици имаат доволна широчина и солидни услови на нив да бидат подигнати дрвореди. Набавката и засадувањето на садниците, како што се наведува, е мал финансиски товар кој општината може да го понесе лесно на различни начини. Годишно во Општина Тетово може да се засадуваат повеќе од 1000 дрвја. Тетово се наоѓа во очајна ситуација, зелени површини речиси и да не постојат, а секојдневно сме сведоци на издигнување нови згради една до друга. Градот нема парк во вистинска смисла на зборот. Во ваква ситуација, неминовно е посадувањето на дрвја на места погодни за ова“, велат од „Тетово сака парк“.
Од иницијативата прво излегоа со илустрација пред и потоа на улицата „ЈНА“ (делот кај Ајдучко Маало), а беше претставен и дел од улицата „Борис Кидрич“ – како би изгледала ако се прифати ваквиот предлог за засадување на нови дрвја.
-Новопосадените дрвја ќе влијаат кон чистење на воздухот, во подобрувањето на јавното здравје, а ќе ја намалат и температурата на улиците, што во ваква градежна офанзива станува сериозен проблем. „Тетово сака парк“ ќе продолжи активно да ги посочува градските простори кои имаат капацитет и можност за нови садници, а во насока на неутрализирање на штетните последици од непланското градење и бранот на бетонизирање на градските површини, велат од иницијативата.
Тие се залагаат да се формира прв градски парк со површина од 16 хектари со оглед дека сите површини со зеленило се под минимумот од еден хектар. Идејата е предложена уште во февруари 2022 година.
