Новогодишниот концерт од КУД „Кирил Пејчиновиќ“-Теарце беше причина да биде полна салата во Центар за култура „Иљо Антески-Смок“ во Тетово и ја покажа големата желба на граѓаните да дојдат, да видат и да уживаат во македонски фолклор. Прекрасниот спектал кој го подготвија играорците и управниот одбор на Културно-уметничкото друштво започна со заедничката изведба на песната „Ни прела гора“.
Големата група при Друштвото настапи со кореографските постановки Посеље, Роненка, Жетварка, Пијанец. Малата група настапи со кореографиите Што имала ксмет Стамена, Беровка, Малешевска, Црногорка. Покрај домаќините – играорците од КУД „Кирил Пејчиновиќ“ како гости настапија Трио „Кладенец“, Трио „Шербет“ и хор „Менада“.
Гледачите не ги штедеја дланките со аплауз да ги наградат прекрасните настапи на играорците.
Претседателот на КУД „Кирил Пејчиновиќ“-Теарце Гоце Симјановски додели благодарници на гостите кои настапија на концертот и ја збогатија вечерта со своите музички композиции.
-Благодарам што дојдовте во толку голем број на овој наш новогодишен концерт, кој прв пат го правиме тука во Центарот за култура. Мислам дека и понатаму тука ќе правиме концерти. Благодарам до сите спонзори и помагатели, порача Гоце Симјановски.
Новогодишниот концерт беше круна на 2022 година, а гледачите имаат прилика да слушнат за сите годинешни настапи, успеси и постигнувања направено дома, но и на меѓународни фолклорни фестивали каде што освоија бројни награди и признанија.
Наредната 2023 година ќе биде година за одбележување на 10 годишниот јубилеј на КУД „Кирил Пејчиновиќ“. Во Друштвото членуваат над 80-тина млади љубители на фолклорот кои со љубов ја негуваат македонската фолклорна традиција.
