Државниот инспекторат за животна средина донел решение со кое се изрекува парична казна за фирмата ДТУ „Еко Ливинг“ ДООЕЛ Чегране за пожарот што се случил на депонија каде бил складиран отпад. Согласно решението, фирмата има обврска изгорениот комунален отпад треба да го отстрани од локацијата близу селата Стенче и Волковија.
– Изготвено е решение и платни налози за правното (9000 €) и физичкото лице (500 €). Со решение е задолжен комуналниот отпад од локацијата што се запали во рок од 90 дена да го однесе на депонијата Русино и забрана да носи комунален отпад на истата локација, информираше Сретен Стојковски, директор на Државниот инспекторат за животна средина.
Според жителите на Волковија и денес од локацијата се забележува помалку чад, а непријатната миризба сè уште се чувствува и во Тетово.
Претседателот на Полошкиот плански регион, воедно и градоначалник на Тетово, Биљал Касами денес информираше дека општините самите ќе го регулираат собирањето на сметот, додека оставањето/депонирањето ќе се реализира кога општините ќе реализираат обврските кон регионалната депонија Русино
– Државната инспекција треба да ги контролира и општините и депонијата и другите чинители дали работат согласно законот. Депонијата Русино ги исполнува сите услови, но треба сите општини да ги реализираат своите обврски за да може да профункционира согласно еколошките стандарди, изјави денес Биљал Касами.
Фирмата чија депонија се запали, од Министерството имала концесија за собирање на смет од Општина Брвеница, со обврска количините да ги носи во депонијата Дрисла кај Скопје.
ас